මුදල්, ක්‍රමසම්පාදන හා ආර්ථික සංවර්ධන අමාත්‍යාංශය නියෝජනය කරන නිලධාරීන් ප්‍රකාශ කළේ යම් යම් කොන්දේසි යටතේ වාහන ආනයනය කිරීමට අවසර දී ඇති බවයි.
විදේශ විනිමය සංචිත ආරක්ෂා කිරීම, අතිරික්ත වාහන ප්‍රමාණයක් ආනයනය කිරීම අධෛර්යමත් කිරීම සහ අනවශ්‍ය වාහන තොග බැහැර කිරීම යන කරුණු සැලකිල්ලට ගනිමින් සාමාන්‍ය ආර්ථික ක්‍රියාකාරකම් දිරිමත් කිරීම සහ රටේ ආර්ථික ස්ථාවරත්වය ආරක්ෂා කිරීම සඳහා වාහන ආනයනයට අදාළව මෙම කොන්දේසි පනවා ඇත.
ඒ අනුව ශ්‍රී ලංකාවට ආනයනය කිරීමට අවසර ලබා දී ඇති වාහන දින 90ක් ඇතුළත ලියාපදිංචි කළ යුතු බව පාර්ලිමේන්තු සන්නිවේදන දෙපාර්තමේන්තුව නිවේදනයක් නිකුත් කරමින් සඳහන් කරයි.
තවද, විශේෂයෙන් කිසියම් ආනයනකරුවෙකු විසින් ආනයනය කරන ලද මුළු වාහන සංඛ්‍යාවෙන් 25%ක් මාස 6ක් ඇතුළත ලියාපදිංචි නොකළහොත් ආනයනය කිරීමේ සම්මුතිය අත්හිටුවන බවද එම නිලධාරීහු පවසති. ලියාපදිංචි නොකළ වාහන සඳහා 45% ක උපරිමයකට යටත්ව 3% ක දඩයක් ද නියම කෙරේ.
(C.9) ප්‍රකාශය අංක 1.9 හි සඳහන් ආනයන හා අපනයන නියාමන පනත යටතේ ප්‍රකාශයට පත් කර ඇති අංක 2421/04 සහ 2421/44 දරන අතිවිශේෂ ගැසට් පත්‍රය සැලකිල්ලට ගනිමින් පාර්ලිමේන්තු මන්ත්‍රී ආචාර්ය හර්ෂ ද සිල්වා මහතාගේ ප්‍රධානත්වයෙන් පැවැති රාජ්‍ය මුදල් පිළිබඳ කාරක සභා රැස්වීමේදී මෙම තොරතුරු අනාවරණය කරන ලදී.
යම් කිසිවකුට පුද්ගලික ධාරිතාවයකින් වාහන ආනයනය කිරීමට අවශ්‍ය නම් එක් වාහනයක් පමණක් ආනයනය කළ හැකි අතර වෙළෙන්දෙකුට එවැනි තත්ත්වයක් නොමැති බව අමාත්‍යාංශ නිලධාරීන් ප්‍රකාශ කළා.
කාරක සභාව 2012 අංක 12 දරන මුදල් පනත යටතේ ඇති වාණිජ මධ්‍යස්ථාන රෙගුලාසිය ද සැලකිල්ලට ගෙන එකී රෙගුලාසිය අනුමත කරන ලදී. නිශ්චිත කොන්දේසිවලට යටත්ව 2025 පෙබරවාරි 21 දක්වා මාස 3ක කාලයක් ඇතුළත LAUGFS Gas PLC හරහා අමතර LP ගෑස් මෙට්‍රික් ටොන් 9000ක් දේශීය වෙළෙඳපොළට නිකුත් කිරීමට මෙම රෙගුලාසිය නිකුත් කර ඇත.
මෙම රැස්වීමට ගරු නියෝජ්‍ය අමාත්‍යවරුන් වන ආචාර්ය හර්ෂණ සූරියප්පෙරුම, චතුරංග අබේසිංහ සහ පාර්ලිමේන්තු මන්ත්‍රීවරුන් වන රවී කරුණානායක, හර්ෂණ රාජකරුණා, වෛද්‍ය කෞෂල්‍ය ආරියරත්න, විජේසිරි බස්නායක, තිළිණ සමරකෝන් සහ නීතීඥ ලක්මාලි හේමචන්ද්‍ර යන මහත්ම මහත්මීන්, පාර්ලිමේන්තු සන්නිවේදන දෙපාර්තමේන්තුව පවසයි.
Comments